مراجعة لعبة Assassin’s Creed Odyssey الجديدة على الكمبيوتر قبل نزولها رسيماً لأول مره

مراجعة لعبة assassins creed odyssey للكمبيوتر و الأكس بوكس
0

مراجعة لعبة Assassin’s Creed Odyssey : لأول مره فى الوطن العربي هنقدملكم مراجعة لعبة أساسين كريد اوديسي بشكل سريع قبل نزولها رسمياً علي سوق ألعاب الكمبيوتر و الأكس بوكس و البلاي ستيشن لأن كل محبي ومتابعي كل ما هو جديد فى عالم ألعاب PC لايجدون محتوي عربي موثوق فى مجال العاب الكمبيوتر وقد جاء الوقت لكي نهتم بكل مستخدمين و محبي الألعاب الكمبيوتر و الأكس بوكس بشكل كامل.

سنتتطرق الأن لأول أنطباع عن لعبة Assassin’s Creed Odyssey لكل مستخدمين النسخة التجريبية من اللعبة من خلال موقعكم جوال أبس ويمكنك التعرف على الموقع الرسمي لشركة يوبي سوفت العالمية .

أول انطباع عن لعبة Assassin’s Creed Odyssey الجديدة على الكمبيوتر:

 

تعالوا نتكلم بحرية عن Assassin’s Creed Odyssey و تعالوا نتعرف على ايه اللي هنشوفه فى اللعبة و التجديدات اللي حصلت عليها و انطباعنا عنها و هنتكلم برضه عن الحاجات اللي نفسنا نشوفها فى اللعبة .

احنا معندناش اي مشكلة بين التشابه الكبير بينها و بين Origins بس الاهم عندنا هو Gameplay من خلال عروض اللعبة و العروض اللي الناس لعبتها شايف ان فى اختلافات جيدة فى اللعبة بس حابين الاول نشرح حاجة ، احنا متفقين مع اي حد بيقول ان Assassin’s Creed Odyssey خرجت عن نص Assassin’s Creed الكلام دا صح بنسبة كبيرة بس تعالوا نشوف الموضوع بطريقة تانية .

العاب الجيل دا محتاجة تتوسع و تقدم حاجات جديدة ، الاسلوب القديم بتاع Ezio و Black Flag مثلا و Unity و Syndicate انتهوا خلاص و لو UbiSoft عملت نفس Assassin’s Creed  بنفس  Gameplay الجزء التاني فاللعبة هتكون عقيمة من الصعب او من المستحيل انك تقدم لعبة نزلت على الجيل اللي فات و تحط نفس الجيم بلاي على الجيل دا مينفعش اللعبة هتكون عبارة كمية ملل رهيبة Mechanics عقيمة و افكار اقل من القليل .

مراجعة لعبة assassins creed odyssey
مراجعة لعبة assassins creed odyssey

فا Assassin’s Creed 2 فى وقتها كانت عظيمة لكن دلوقتي اللاعب صعب انه يتقبل دا حتى بلاك فلاج اللي تعتبر افضل تحسن و توسع لـ Assassin’s Creed فبرضه عانت فى قلة الافكار ، زي المهمات اللي كانت بتكرر بشكل رهيب فالسلسة كانت محتاجة تتغير و افضل طريقة للتغير دا كانوا يضيفوا عناصر RPG و يقدموا Reboot ليها و اللعبة كانت محتاجة دا و زي ما قولنا مكنش ينفع تكمل بالطريقة القديمة فالحل كان اما تقتل السلسلة او تغيرها معندناش اى مشكلة خالص بس اهتموا بحاجات تخلينا نستمتع طول فترة تجربتي للعبة .

فا جزء Assassin’s Creed Origins كان بيعاني من حاجات خلتنا بصراحة نفصل فى اوقات معينة ، فالسينمائية محتاجة تتحسن نتمنى انهم يقدموا مشاهد سينمائية يكون فيها لحظات مؤثرة و مشاعر ، بس بصراحة التصوير و الكاميرا كانوا افضل بكتير فى Assassin’s Creed Odyssey فكرة ان المشهد يتشاف من كذا زاوية دي فكرة لا بأس بها ، اكيد طبعا نظام الكاميرا الواحد او One Camera Shot زي God Of War هيكون متعب ليهم و استحالة يتعمل .

مقارنة مع The Witcher 3 :

لعبة the witcher 3
لعبة the witcher 3

معندناش اي مانع انها هتكون زي Witcher 3 بس اللي ميز ويتشر 3 هي الشخصيات و الكتابة و الحوارات Assassin’s Creed  شخصياتها الثانوية كلها مفيهاش اي تفاعل صعب تتفاعل معاها لانها محدودة و الحوارات فيها سيئة جدا ، لكن مثلا Witcher 3 و اسلوب الكتابة الممتاز للغاية فإحنا عاوزين نشوف شخصيات نقدر نتفاعل معاها و نعيش فى عالمها و كمان يربطوا الشخصيات الاساسية و الثانوية بالمهمات الجانبية و تتطور علاقتك معاهم ، متكنش مجرد شخصيات محطوطة علشان اعملهم مهمات جانبية و بعدين خلاص شكراً دورك خلص و مش هتشوفها تاني .

يعني اللي عجبنا فى شخصيات Witcher 3 ان كل شخصية ثانوية ليها قصتها حتى لو ليها مهمة جانبية واحدة او اتنين فقصة الشخصية دي بتكون ممتازة ، مثلا زي المهمة بتاعة الراجل اللي بيتحول لذئب و يتفاجئ انه اكل مراته و السبب اختها ، يعني القصص بتاعة الشخصيات الثانوية كانت مكتوبة بإحتراف و بطرق صعب انها تتصدق ، او حتى شخصية إلسا اللي كانت فى رواية Orchid ولو قتلت البارون فهي هتشهد على الكلام دا و هتفضحك يعني اللي هو كل حاجة و ليها حاجة و دي ابسط مثال للعواقب .

احنا بقى عاوزين نشوف كدة فى Assassin’s Creed Odyssey و مننساش برضه فى شخصيات Witcher 3 كنا بنتحكم فى جزء من مصيرهم زي كيراميدز على سبيل المثال ، فا ليه Assassin’s Creed Odyssey متبقاش Witcher 3 فى موضوع الشخصيات دا و ليه اصلا المطورين اللي بقالهم 3 سنين شغالين عليها ميقدموش شخصيات فعالة و بيركزوا بس على الكتابة اللي ممكن تكون سطحية و يهملوا الشخصيات ، حتى الاعداء فى Witcher 3 سابت بصمة فى اننا صعب ننساها زي مثلا ديدلا فى ال Vampire و اعداء تانية كتير .

مراجعة لعبة اساسن كريد odyssey
مراجعة لعبة اساسن كريد odyssey

كل الاعداء دي لحد دلوقتي فاكر قصتهم فالشخصية دي عميقة و كتابتها و حوارتها ممتازة ليه Assassin’s Creed Odyssey متبقاش زيها طالما هي بقالها 3 سنين فى التطوير ليه مثلا فى Assassin’s Creed Origins الشخصية بمجرد ما بتقتلها فانت اصلا نسيت انك قتلتها ، فا Assassin’s Creed  دايما بتفشل فى الحوارات و الكتابة و القصة و الشخصيات بيهملوها و المهمات الجانبية اللي بتكون سيئة .

يعني ماشي مطورين Ubisoft قدموا بيئات و Gameplay و Combat و استكشاف و حاجات كتيرة و اللعبة بيساعد فى تطويرها حوالي 8 استديوهات طيب و بعدين فين الاهتمام بباقي عناصر اللعبة فاحنا عاوزين نشوف Assassin’s Creed Odyssey بنكهة Witcher 3 عاوزين نشوف حوارات و كتابة و شخصيات عميقة تخليني اتفاعل مع عالم اللعبة .

المهمات الجانبية كانت عبارة عن هدف واحد حدد اهجم اقتل حرر و طبعا Level اللي كان شئ سئ جدا كنت لازم تستحمل قلة افكار المطور بالمهمات الجانبية و تلعب مهمات جانبية كتيرة بنقط XP قليلة علشان خاطر ترفع Level بتاعك علشان تتماشى معه مهمة القصة فا دي حاجة كانت بتفصلنا فى اللعبة .

تغيير سلاح الـ Hidden Blade فى Assassin’s Creed Odyssey :

احنا متقفين مع اى حد بيقول ان اللعبة مبقتش Assassin’s Creed بقت لعبة مختلفة و مبقاش في Hidden Blade مع ان الـ Hidden Blade كان موجود ساعتها لواحد Assassin اسمه ديارس سنة 465 ق م ، بس الـ Hidden Blade اللي عثر عليها كليوبترا فى مصر فى جزء Origins و اكيد طبعاً فى القصة دي ان كليوبترا هتدي الـ Hidden Blade الي آية و هي هتديه لـ بايك ، فالـ Hidden Blade كان موجود و محدش عثر عليه غير كيلوبترا غير فى 48 ق م .

المهم بالنسبة لـ Assassin’s Creed Odyssey فهي هتقدم سلاح زي Hidden Blade اسمه spear of longinus و دا زي Art Fact مصنوع من الحضارة الاولى و هتستخدمه طول فترة اللعب ، احنا حتى مش عارفين اذا كانت اللعبة هتقدم صراع بين Assassin’s و الـ Templars ولا هتكون القصة شكلها ازاي بس هي احداثها فى سنة 481 ق م  قبل جزء Assassin’s Creed Origins طبعاً و احداثها هتبقى فى اليونان وانها هتتكلم عن حرب Peloponnesian و البطل هو واحد من المرتزقة اللي بتختار تحارب مع جيش اثينا او جيش سبارتا .

شخصيات و قصة واسلوب اللعب فى لعبة Assassin’s Creed Odyssey :

بتبدأ اللعبة و بتديك اختيار ذكر او انثى Alexios او Kassandra الاتنين اخوات و بيشاركوا نفس القصة و الاحداث ، و سمعنا اشاعة بتقول انك لو لعبت بالبنت Kassandra فأنت فى الاخر هتقابل اخوها و العكس برضه نفس النظام ، بالنسبة لنظام الـ Combat فإحنا شايفين ان للعبة تخلت عن نظام الدرع و تاني اللي هو مثلا زي Dark Souls لما حد بيضربك و لو صدتها فى الوقت المناسب فأنت بتضربه بضربة قوية .

assassins creed odyssey pc
assassins creed odyssey pc

برضه الـ Rolling اتغير عن نظام الزحلقة بتاع اورجينز الـ Rolling فى Assassin’s Creed Odyssey افضل بكتير و بالاخص فى Kick و كل دا من الـ Abilities اللي بتشتريها و امكانية انك تسن السيف بالنار و تخليه يولع نار و دا بيكون من خلال الـ Spear اما يكون حد بيحاربك و معاه درع فا ممكن تسحبه منه وتضربه بيه ، اما بالنسبة لعناصر الـ RPG فاللعبة بقت RPG متكاملة زي Witcher كدة شخصياً معندناش مشكلة فى دا لو اتنفذ بطريقة صح .

اللعبة برضه بتقدم أسلحة بـ Level مختلف و كل سلاح بـ Armor بيقدم نسبة دفاع و هجوم بقوة مختلفة و زي لعبة God Of War فى Armor بيرفع من الـ Health و هكذا ، اللعبة فيها امكانية انك تحط اضافات على الشخصية و دا بيكون من خلال Engraving List و دي زي Attachment بتتحط على الشخصية علشان ترفع من حاجات معينة زي الضربات النارية بتاعة السيف او ترفع من ضربات السامة .

القرارات و مدى تأثيرها فى لعبة Assassin’s Creed Odyssey :

بالنسبة للقرارات و الاختيارات فاللعبة Assassin’s Creed Odyssey اول مرة تقدم حاجة زي كدة و بصراحة من العروض اللي شوفناها فعندنا شوية تحفظ من الواضح ان نظام الـ RPG مش هيكون مؤثر بطريقة قوية القرارت فى اللعبة مش مبنية على التعديل فى التاريخ لكن مبنية على موقف بيتغير ، موقف و نهايات بتختلف على حسب القرارت اللي بتاخدها فى اللعبة و كمان فى علاقات حب بتعملها فى المحادثة و قرارتك فى المحادثة .

و دا بيكون من خلال علامة القلب اللي بتخليك تعمل علاقة مع شخصية معينة سواء ذكر او انثى ، فا في اختيارات اما مثلا تشارك مشاعرك مع شخصيات او لا و من خلال اختيارك بتعمل العلاقة دي ، و لو عاوز تعمل علاقة مع شخصية مرتبطة فده برضه بيأثر على البطل و دا واضح ان الاستديو متأثر جدا بلعبة The Witcher 3 لكن الكلام مش على القرارات فقط ، فاللي احنا شوفناه من عروض اللعبة القرارات متقدمة بشكل كويس جدا .

لكن تأثيرها مش عارفين هتتقدم ازاي يعني مثلا انك تختار تكذب او تقول الحقيقة هل الموقف هيختلف بعدها على الشخص اللي كذبت عليه ، و الاهم اختيارك هل هيكون ليه عواقب و هل ممكن تتسبب فى موت شخصية ما الاختيارات لو مكانتش اخيارات مصيرية و اختيارات سطحية و ملها تأثير فبصراحة دي هتكون صدمة كبيرة ، يعني فى Witcher 3 كانت الاختيارات فيها مصيرية بشكل لا يصدق فمثلاً اكيد الكل فاكر لحظة الاختيار بين انك تختار تساعد الساحرات الثلاثة و تقتل الشجرة المسكونة او متقتلش الشجرة المسكونة و يترتب عليها قرار اخر وهو موت مرات البارون .

فإحنا حبين نشوف حاجة زي كدة فى جزء Assassin’s Creed Odyssey و بالنسبة لنا هي دي القرارات اللي لازم تكون موجودة انما قرارات سطحية زي انها تغير فى موقف بنسبة بسيطة فدي حاجة مفيهاش اى ابداع و طبعا الاختيار بيكون ليها طرق معينة بأنك ازاي ترد فى الحوار إنك ترد بعد ولي او تكذب بس هل طريقة الرد هتختلف فى معاملة الشخص اللي بتتكلم معاه و الكذب على الشخصيات هل هيأثر على علاقتك معاهم ، القرارات فى اللعبة لو اتنفذت صح فإحنا متوقعين ان الجزء دا هيكون افضل جزء من Assassin’s Creed  .

المعارك فى لعبة Assassin’s Creed Odyssey :

اللعبة هتقدم معارك بحرية زي بلاك فلاج و فى تحسينات كتيرة عن نظام المعارك البحرية و امكانية تعيين طاقم للسفينة ممكن تناديهم فى مهمات معينة و تخليهم ينضموا معاك فى السفينة و امكانية صيد اسماك القرش ، اللعبة برضه فيها معارك تاريخية و ملحمية و فيه معارك بين 150 شخص من جيش اثينا ضد 150 شخص من جيش سبارتا بس نتنمى ان يكون فى اختيار فى تنظيم المعركة و متكونش عشوائية .

يعني طالما هي لعبة RPG المفروض مثلا تقدم خطط و اللاعب يختار انسب طريقة لهجوم المعركة و يكون فى جنود مختلفة مثلا جنود معينة للهجوم و جنود راكبين احصنة و جنود معاهم قوس و هكذا ، و الاهم ان يكون فى اماكنية انك تصمم المعركة دي ازاي يعني ليه متكونش زي معركة كار مورهين بانك تصمم كل حاجة بينا الدفاع و الهجوم او حتى زي Shadow OF War .

و كمان الشخصيات اللي البطل طور علاقته معاهم طول فترة اللعب المفروض يكون ليهم دور فى معارك اللعبة و يكون فى امكانية انك تنقذهم او تسيبهم يموتوا فهي دي عناصر الـ RPG اللي عاوزين نشوفها شوية قرارات و خلاص لا مينفعش لازم يكون فى افكار مميزة طالما عاوزين يتجهوا للنوع دا ، و حاجة تانية لو خسرت المعركة ايه اللي هيجرى هل هنعيدها من تاني و لا اللعبة هتكمل بأنك خسرت المعركة و انك فاشل فى نظر الناس .

ما هو الشبه بين Assassin’s Creed Odyssey و The Witcher 3 :

فى تشابه كبير بين Assassin’s Creed Odyssey و The Witcher 3 يعني البطل مثلاً بيعمل مهام مقابل اجر من الفلوس geralt white wolf لـ Witcher المكروه من الناس اللي برضه بيعمل مهام مقابل فلوس فا دي نقطة تشابه كبيرة بين اللعبتين ، بس فى نقط كتير مختلفة فى Witcher 3 انت بتعمل كل جهدك علشان تنقذ سيري انت مش انسان في رأس العالم انت اقل من البشر انت مسخ .

انت فى نيفجراد فى حالك علشان الويتشهانترز فى سجليكا انت عاوز تثبت نفسك و تحترم علشان الناس تعاملك بالمثل فى توزان انت محدش يعرفك و هيعرفوك بعدين و يا إما يحترموك يا لا ، و الاهم ان علاقتك معاهم بتطور لما بتساعدهم و بتعملهم مهمات و بيتفاعلوا معاك لكن مين Alexios او Kassandra دا انت مرتزقة لكن هل الناس هتتعامل معاك على انك مرتزقة ولا هيتعاملوا معاك على انك بني ادم عادي و العلاقة هل هتكون سحطية و لا هتطور مع الوقت و هل اختيارك فى انك تحارب مع جيش اثينا او اسبارتا هل دا هيختلف فى احداث اللعبة و نظرة الناس ليك هل هتختلف ؟

و فى Assassin’s Creed Odyssey فى مهمة جانبية بتهزم دب عملاق و بتختار انك تقبل المهمة ولا لا و لما بتقتله بتختار انك تاخد الفلوس ولا لا ، يعني الي حدا ما بتحاول تحسن من افكارها حتى لو الافكار دي اتطبقت فى العاب كتيرة RPG ، و برضه اللعبة هيكون فيها اكتر من نهاية بس لسة محدش عارف دا هيكون ازاي بس اكيد النهاية هتكون مترتبة عليها قرارتك فى اللعبة .

مشاكل نتمنى عدم وجودها فى لعبة Assassin’s Creed Odyssey :

فى حاجة كانت موجودة فى Assassin’s Creed Origins موجودة برضة فى Assassin’s Creed Odyssey و اتمنى انها تتعدل و هي الـ Stealth لما بتلعب و بتقابل شخصية قوية صحتها كبيرة و لما بتقتله Stealth بتلاقي انه مامتش لكن صحته نزلت للنص مثلاً فا دي بصراحة حاجة مش حلوة خالص .

يعني ايه احنا بلعب Stealth يعني المفروض لما بنلعب Stealth و نيجي اموت حد يموت على طول زي الاجزاء القديمة اللي مكنتش محتاجة تطور اسلحة علشان تموته بالكامل Stealth ، يعني المفروض البطل و دخل معسكر الهدف و داخل يموت واحد بسكينه فى دماغه مثلا فتخيل ان صحته تنزل النص و لسة عايش و يقوم يفرمنا و يضرب الانذار فا دي حاجة مكناش بنحبها فى Assassin’s Creed Origins موجودة برضه فى Assassin’s Creed Odyssey و نتمنى انها تتعدل .

الاستكشاف و الخريطة فى لعبة Assassin’s Creed Odyssey :

الاستكشاف و الـ Loot شايفنهم متغيروش هما ممتازين طبعا و موجودين بنفس طريقة Assassin’s Creed Origins ، و الخريطة حجمها كبير و تم وصفها بانها أكبر خريطة فى السلسلة و فى جزر كتير بالاضافة الي المدن و الغابات بس نتمنى انهم يستغلوا الاماكن الفاضية زي البحار مثلا و الجبال و الكهوف و الـ Skill Tree اتحسنت و بقت اوضح و اللعبة هتقدم امكانية انك تحارب آلهة اغريقيين .

ف النهاية دا انطباع عن Assassin’s Creed Odyssey و نتمنى الحاجات اللي قولنا عليها تكون موجودة بالفعل اما بقى لو مكنتش موجودة بقى فشكراً ، و ياريت تدونا رأيكم فى الكلام اللي قولناه و هل احنا بنتكلم صح و لا ليكم رأي تاني و عاوزين نعرف برضه ايه رأيكم فى الاتجاه الجديد للعبة ، و بنشكركم على المتابعة و نتمنى انك تتباعه الموقع من خلال انك تدوس على علامة الجرس علشان تشوف مراجعات تانية عن اضخم الالعاب .

اترك تعليق

يرجي التسجيل لترك تعليقك

شكرا للتعليق