مراجعة لعبة Detroit: Become Human للبلايستيشن مع قصة اللعبة

مراجعة لعبة Become Human للبلايستيشن
0

مراجعة لعبة Detroit: Become Human – موجهة للناس اللي بتحب الالعاب التفاعلية و لما جربنا Beyond Two Souls من اجمل تجاربنا على الجيل اللي فات لقينا اننا محتاجين المزيد من الالعاب التفاعلية اللي معمولة بميزانية و تقنيات عالية فلعبة Detroit موجهة للناس اللي عاوزين تجارب بتعتمد على قرارت اللاعب  وكل ده هنعرضه على موقعكم جوال أبس .

قصة لعبة Detroit: Become Human للبلايستيشن :

لعبة Detroit: Become Human – قصة اللعبة عبارة عن ربط 3 شخصيات بعالم واحد او ربط 3 قصص فى عالم واحد بحيث ان عندك 3 شخصيات اندرويد كارا و ماركس و المحقق كونر كل واحد من الشخصيات دي له اتجاه و قصة مختلفة ، فيه اللي بيهرب من مكان لاخر و فى الشبح اللي ملوش اى هوية وفى المنقذ ، و طبعا المحقق كونر بيبحث و بيطارد و بيحقق عن اندرويد اللي انحرفت عن برمجتها و اصبحت ديفينت ممكن كلهم يعيشوا او يموتوا دا متوقف على اللاعب و اختياراته اللي بتشكل القصة .

قصة اللعبة فى مدينة Detroit فى عام 2038 حيث ان شركة Cyber life بقت بتصنع اندرويد و بقت جزء اساسي من العالم دا و بصراحة اللعبة جسدت الروبوت بطريقة ممتازة ، فمطورين اللعبة استعانوا بخبرات العلماء الملمين بتطورات العالم ، و بالفعل المطورين نجحه فى دا خصوصاً لما خلقوا عالم خاص بالاندرويد و خلوا البشر مجرد ناس ملهمش اى اهمية لان الاندرويد هما اللي ليهم الاولاوية و هم مكروهين من البشر لكذا سبب زي البطالة و انهم اتصنعوا فقط للعمل لا بياكلوا و لا بيناموا و لا حتى بيبردوا .

مراجعة لعبة Detroit: Become Human
مراجعة لعبة Detroit: Become Human

فالفريق قدم تخيل و تصور ممتاز للمستقبل اللي ممكن فعلا فى وقت من الاوقات ان الروبوت بقى جزء اساسي فى عالمنا خصوصا ان حاليا بقى فى شركات كتير بتبدأ انها تروج لذكاء اصطناعي زي شركة Asus لكن مثلا عندنا برضه روبوت اسمه صوفيا من شركة هانستون و اللي متصمم مخصوص علشان يتعلم و يتأقلم مع تصرفات البشر.

قصة اللعبة ممتازة فأنت بتقابل 3 قصص و بتعيش جوة كل شخصية بقرارتها و بأخطئها ، فالشخصيات كانت حاجة رائعة فمثلا المحقق كونر و لحظة التحقيق عن الشخصيات الاساسية التانية و اللي بتخلي اللاعب فى حيرة ، القصة اشبه بفيلم سينمائي فى سرد قصتها و ابطالها اشبه بالممثلين الكتابة و الحوارات شئ عظيم و اعظم شئ هو تصرفات ابطال اللعبة اللي بتختلف من بطل لاخر و كل قصة اندرويد ليها مسار بتمشي فيه .

و بالرغم بانك بتلعب بشخصية اندرويد لكن دايما هيجيلك الشعور بأنك بني ادم طبيعي عندك مشاعر و عاطفة و احساس فقصة Detroit هي قصة انسانية الشخصيات الاندرويد كلها كانت ممتازة و مميزة عن بعضها ، و افضل شخصية بالنسبة لينا هي كونر و علاقته مع هانك اللي كانت بتطور بشكل ممتاز .

و عموما كل الشخصيات الثانوية كانت علاقتها بتطور مع البطل الاساسي و تطورها بيكون بناءً على اختيارات اللاعب بتطور مثلا زي عدو او صديق او حبيب كل دا متوقف على اختيار اللاعب ، فاللعبة قدمت قصة ممتازة و تكاد تكون من افضل قصص الالعاب اللي شوفناها فهي بتقدم تفاصيل اجتماعية و اخلاقية و بتعلم اللاعب تفاصيل كتيرة مهمة .

طريقة اللعب او Game play فى لعبة Detroit: Become Human :

الكاتب و مخرج اللعبة David Cage بيحب يقدم العاب بأسلوب معين و مش بيحب يقدم العاب مبنية على العنف ، فالالعاب اللي بيحب يقدمها فهي العاب بتعتمد على الغموض التحقيق عن جرائم مختلفة و طبعا الجانب البوليسي اللي مبدع جدا فيه ، و دا اللي بيحب يقدمه David Cage في فريقه Quantum Dreams بجانب القيم فهو بيهتم بجانب القصة و سردها مع جيم بلاي بسيط مفيهوش اي تعقيد .

و بكدة هو بيبعد عن الالعاب العنيفة او الالعاب المتقلدة من العاب بأساليب اخرى ، فالالعاب اللي بيقدمها فهي موجها لكل الناس حتى اللاعبين الكاجول و طبعا العابه كالعادة بتقدم محور و فلسفة معينة و هي الانسانية و العاطفة ، فلو العاب الفريق مش هتعجبك بأكيد لعبة Detroit مش هتعجبك و لكن اديها فرصة و جربها و اسمع رأينا عنها بالكامل .

مراجعة لعبة Become Human للبلايستيشن
مراجعة لعبة Become Human للبلايستيشن

Detroit: Become Human بتحط اللاعب فى اصعب المواقف و الحوارات وبتقول له اختار بس كل حاجة بتعملها بتترتب عليها حاجات اخرى زي مثلا نهاية مختلفة او تغيير جزي فى احداث اللعبة او موت شخصية اندرويد ، اللعبة كلها حوارات و تفاعل بالازرار و اللاعب بيختار بناء على اختياراته و بتلعب بالـ 3 شخصيات و كل واحد له اهدافه الخاصة ، اللعبة بتبدأ و بتديك اختيارين من الصعوبة Casual و Professional .

Casual هنا انك لو اتسببت فى موت اندرويد فا بيديك فرص كتيرة بإنك ترجع الشخصية تاني ، اما Professional لو موت شخصية اندرويد من اول مرة فا مش هتقدر ترجعها و اللعبة هتكمل من غير الشخصية دي ، اللعبة مفيهاش كلمة Game Over فالخسارة او الفشل مش موجودين اما تخسر شخصية و اللعبة بتكمل من غير الشخصية دي او تكون حذر فى قراراتك ، كمية قرارات و اختيارات عظيمة كل قرار بيكون له سرد قصصي ممتاز ، او ممكن نسميه بأنك بتبني قصتك على القرارات دي و انك ازاي هتخوض المغامرة ، اللعبة فيها قرارات كتيرة اى قرار بيبني قصتك عليه فمثلا اما تكون الشرير او المسالم .

كونر هو الاندرويد اللي بيحقق فى قضايا الاندرويد اللي خرجه عنه السيطرة و التحقيق فى القضايا كانت من اجمل المشاهد اللي هتشوفها انك بتعيش المشهد اللي بتحقق فيه و بتشوف ازاي ان الضحية مات او ازاي هرب و دا بيبقى من خلال الادلة اللي بتجمعها ، اللعبة فيها امكانية انك تشوف مشهد اللي بتحققه بطريقة مميزة ، اما ماركوس فهو عنده امكانية اخرى و هو بيشوف تصرفات مستقبلية بسيطة و نتائج التصرفات دي قبل ما ينفذها .

لعبة Detroit: Become Human هي لعبة دراما و سينمائة تفاعلية الجيم بلاي بيكون من خلال Code Time Event او ضغط زراير معينة و طبعا اختياراتك فى الحوارات و اللي طبعا العاب استديو Quantum Dreams ابدع جدا فى الاسلوب دا من الالعاب فهو قدم Heavy Rain و العزمة Beyond Two Souls و بالرغم من ان اللعبتين دول اخدوا افكار ممتازة الا ان Detroit: Become Human افكارها افضل بكتير و طورت بشكل كبير فى الحوارات و طريقة ربطها او علاقتها بالمشاهد الاخرى و طبعا طورت من القرارات و تأثيرها على باقي المشاهد .

فاللعبة فيها قرارات مصيرة لدرجة انك ممكن تتسبب فى موت اشخاص بغلطة مش مقصودة و مع نهاية كل Chapter اللعبة بتوريك نهايات و مسارات الاحداث و لو اخترت قرار ندمت عليه بعد كدة فاللعبة بتديك امكانية انك تعيد الـ Chapter دا من الاول و تصلح قرارك دا ، لكن اللعبة بتنصحك انك تختم اللعبة كلها لاول مرة حتى لو كانت قراراتك غلط و تختمها من غير اى تعديل فى قراراتك .

و كل حاجة موجودة فى بيئة اللعب فهي مش موجودة من فراغ و لكن ليها سبب اما انك تستغل وجوده او ان طبعا الامور تتغير لما تستغل وجود تفاصيل او حاجات زي دي فهي بتديك الافضلية و بتديك اختيارات اخرى من المحادثة ، و الاختيارات دي مفيدة جدا و هتساعدك ممكن تخليك تعيش ، اللعبة مليئة باللحظات الممتازة اللي هتفضل فى ذاكرتك و مش هتنسى ابداعها لحظات مطاردة و لحظات درامية ابداعية .

رسومات و جرافيك لعبة Detroit: Become Human :

اما بالنسبة لرسومات اللعبة فدي حصرة اخرى تدخل ضمن قائمة افضل العاب رسوميا ، رسومات اللعبة جميلة للغاية و هي بصراحة نقلة اخرى لجهاز PS4 يقدر يقدمه ، فاللعبة قدمت تعبيرات وشوش و Animation عظيم مش كدة وبس و كمان تصميم الشخصيات اللي واقعي بشكل رهيب ، ملامح الشخصيات و حركة العيون الشفايف مرعبة اهتمام ممتاز بالتفاصيل زي الاسنان اللي شكلها واقعي تفاصيل البشرة و عقول الشخصيات البشرية فكان ممتاز تصميم بيئات اللعبة و عالمها فهو تحفة فنية و اللعبة قدمت تجسيد ممتاز للمستقبل .

المشاهد السينمائية ابداع اللعبة اصلا تعتبر كلها مشاهد سينمائية رسومات اللعبة مش هتعرف تفرقها بين مشاهد اللعب و بين المشاهد السينمائية و اللعبة اصل يبان انها فيلم او اي حد هاوي هيفتكر انها فيلم سينمائي مش لعبة خصوصاً مع كاميرا التصوير اللي تقدر تغير زاويتها ، اللعبة هي افضل عمل تقني قام بيه الاستوديو و على سبيل صعيد فهي تحفة تقنية ، مستوى عروض اللعبة و اخراجها ممتاز و مشاهد كتيرة هتفضل فى ذاكرتك بسبب اخراجها العظيم .

اما على صعيد التمثيل و الادوار فاللعبة قدمت ادوار ممتازة للـ 3 ممثلين كل ممثل من الـ 3 عمل دور واداء حركي ممتاز ، المؤثرات ممتازة تأثير الطقس و سقوط الامطار و التلج وتأثيرها على شخصيات اللعبة ضافة لمسة مميزة لعالم اللعبة و الانعكاسات و جودتها خصوصاً انعكاس الضوء فى الظلام .

الاصوات فى لعبة Detroit: Become Human :

اما بالنسبة للاصوات فالاداء الصوتي لجميع الشخصيات فكان متقن بطريقة رهيبة الشخصيات كلها قدمت اداء ممتاز ، الدبلجة المصرية احنا مع الاسف معجبتناش خالية من اى احساس و تفاعل و لو عاوزين تجربوها فننصحكم انكم تفعلوا الترجمة فقط لكن الصوت يكون انجليزي افضل .

اما بالنسبة للساوند تراك فاللعبة قدمت موسيقى مميزة للغاية و صدق او لا تصدق اللعبة قدمت 3 ملحنين كل ملحن كان لشخصية من شخصيات اللعبة الاساسية و اللي بصراحة كانت بتتناسب مع الشخصية دي و مسارها و اهدافها .

تقييم لعبة Detroit: Become Human :

Detroit: Become Human هي تجربة عمرها ما هتتعوض و مهما استديوهات حبوا يقدموا دراما تفاعلية فمن المستحيل انهم يوصلوا لابداع فريق Quantum Dreams اللي اصبح دا اتجاهه للالعاب ، اللعبة قدمت قصة درامية و حبكة ممتازة .

و هي نقلة جديدة و مختلفة لنوع جديد من الالعاب اللي لازم باقي المطورين يقدموا العاب تفاعلية بميزانيات و تقنيات عالية احنا ختمنا Detroit: Become Human فى حوالي 13 ساعة و اللعبة حتى بعد ما تختمها فا لازم تلعبها مرتين كمان علشان تشوف عواقب القرارات التانية. اللعبة ممتازة ولازم تلعبوها حتى لو مش بتحبوا الالعاب التفاعلية فإدوها فرصة و احنا متأكدين انها هتعجبكم و تقيممنا للعبة Detroit: Become Human هو 9.5 من 10 .

بنشكرم على المتابعة و نتمنى انكم تسيبولنا رأيكم تحت فى التعليقات بعد ما تلعب اللعبة و ايه اللي عجبكم فى اللعبة و اللي معجبكمش شكراً و انتظرونا فى مراجعات تانية كتير.

اترك تعليق

يرجي التسجيل لترك تعليقك

شكرا للتعليق