مراجعة لعبة Far Cry 5 للكمبيوتر و البلايستيشن و الأكس بوكس مع قصة اللعبة

مراجعة لعبة far cry 5
0

مراجعة لعبة Far Cry 5 للكمبيوتر : قدرت تتميز عن جميع اجزاء السلسلة و تقدم حاجات جديدة و تبعد عن روتين الاجزاء اللي فاتت اللعبة احداثها فى ولاية مونتانا فى منطقة بأسم Hope County مع البطل Rocky اللي هيأسس مقاومة للقضاء على القسيس Joseph Seed المعروف بأسم The Father اللي بيعظ الناس فى مدينة هوب اللي بيأمن ان نهاية العالم هتحصل و اللي عمل طائفة و عنده اتباع كتيرة و اللي اشبه بالجيش الخاص به .

و هيأسس مجموعة بأسم Eden’s Gate علشان يقود المواطنين الي الخلاص قبل حدوث نهاية العالم ، فأنت هدفك فى اللعبة هو القضاء على الطائفة دي و تحرير المواطنين و انشاء مقاومة علشان يحاربه معاك وهنشوف تفاصيل اللعبة فى الفقرة اللي جاية من موقع جوال أبس وتقدر كمان تدخل على الموقع الرسمي للعبة فار كراي 5

قصة لعبة Far Cry 5 :

لعبة Far Cry 5 للكمبيوتر – قصة اللعبة احنا شايفنها شخصياً مميزة عن الاجزاء اللي فاتت لان فى الجزء دا انت هدفك انك تقضي على اربعة من Villain عائلة جوزيف سييد كلها Jacob و John و Seth و كل واحد منهم بيحكم منطقة وكل شخصية منهم عنده قصته الخاصة و قدرات وصفات و كاريزما و اهداف مختلفة و ادائهم ممتاز بصراحة اجمل حاجة فى قصة اللعبة هي الاربع شخصيات الشريرة .

القصة ممتازة الحقيقة مش بس فى الشخصيات و لكن كمان فى سرد القصة و اللي فيها لحظات ممتازة جدا ، و دايما هتفكر لو كان فعلا جوزيف سييد هو اللي صح و المقاومة اللي غلط ايه اللي هيجرى ؟! ، كذلك اللعبة فيها قرار مصيري هتقابل لحظات مؤثرة و لحظات حزينة .

و هتتمنى بأن المقاومة مكنتش اتعملت و اللعبة فيها لحظات غير متوقع حدوثها على عكس الجزء التالت او الرابع اللي خلانا نخمن نهايتهم من نص اللعبة مثلاً ، و طبعاً كأي لعبة First Person فالاهتمام بالشخصية الاساسية او البطل فا دورها مش مؤثرا و حتى مش هتتفاعل معاها .

تريلر لعبة Far Cry 5 :

طريقة اللعب فى لعبة Far Cry 5 او Gameplay :

Far Cry 5 قدمت افكار جديدة و حسنت الـ Mechanics بشكل كبير اكيد طبعا اهم ما يميز فاركراي هو عالم اللعبة نفسه و الجزء الخامس بصراحة شوفنا فيه نجاح اضعاف الجزء التالت دا بفضل عالم اللعبة الواسع للغاية و فضل الـ Villain او السيكوباتي اللي طبعاً اساسي للعبة.

اللعبة بتقدم لك الحرية بانك تختار الشخصية اللي هتلعب بيها مع تخصيص لمظهر الشخصية بإنك تعدل على الشكل و الملابس و هكذا ، بس طبعاً زي ما قولنا ان شخصية البطل ملهاش اي دور و حتى فى العروض السينمائية فشكلها مش بيظهر .

من خلال مراجعة لعبة Far Cry 5 سنستنتج أن اللعبة مميزة و التجربة اللي قدمتها الشركة من خلال اللعبة كانت افضل تجربة فى تاريخ السلسلة كلها ، فهي قدمت تنويع ضخم من حيث لعبة بتديك كل الحرية بالطريقة اللي عاوز تلعبها بيها ، و نقصد بالحرية انك تقدر تلعبها مع صحابك كلها Co-op او ممكن تلعبها لوحدك Solo .

طبعا المركبات كتيرة زي الطيارات و العربيات و الشاحنات ، و نحب نشكر المصمم اللي اشتغل على السواقة و نحب نقول برضه لـ Ubisoft نتمنى تخلوا نظام السواقة دا فى كل العابكم المستقبلية.

Far cry 5 تجربة منظور اول اللي بتعمد بشكل كبير على نظام التصويب اللي كان ممتاز طبعا و دور البطل اللي بيجند ناس معينة و تعملهم مهمات اساسية او جانبية علشان من مستوى غضب المواطنين و ينضموا للمقاومة و بعدها بتهجم على الـ Villain وبتحاربه ، احنا شخصياً استمتعنا بكل لحظة من اللعبة و مصابتناش بأي ملل او تكرارية .

المهمات الحقيقة كتير جدا و معظمهم كانوا ممتعين البعض منهم و اللي يتعدوا على الاصابع كانوا عاديين لكن اللعبة ممتعة للغاية ، وبالرغم عن ان اللعبة بتخليك تمشي على روتين واحد لحد ما توصل للـ Villain لكن مع ذلك مكنش في تكرارية و الفضل يرجع لتصميم شخصية الـ Villain فأنت دايما بتكون متحمس لمقابلة الـ Villain دا ، واحد مثلا زي جون سييد بصراحة شوفناها اعظم شخصية فى اللعبة .

فواحدة من اقوى عناصر اللعبة هو انهم حطولك اربعة من الـ Villain بحيث ان اللعبة هتلاقيها متجددة بفضل الشخصيات دي و حماسك لمقابلتهم هيزيد مع الوقت و طبعا اللي خدم الـ Villains دول هو ادائهم و العروض السينمائية ، و اللعبة فيها ميزة انك تعمل Hire و تستعين بالناس اللي معاك علشان يحاربوا فى صفك .

كل شخصية بيبقي ليها مميزات مختلفة مثلا الخبير فى سواقة الطيارات او القناصة جريس و كذا شخصية تانية و اللي كانوا مسليين و الكلام معاهم ممتع ، و لو استخدمت مساعدة اتنين من الشخصيات فالامر هيبقى ممتع بسبب الهزار اللي هيحصل ما بينهم بس مع الاسف ان الكلام او الحوار ما بينهم بيتكرر .

و طبعا الحيوانات اللي بتساعدها فى مهمات القصة ممكن يحاربوا معاك وليهم قدرات خاصة زي الكلب Boomer اللي بيعمل Loot للناس اللي بتموتهم و بيكشفلك اماكنهم و طبعا لما بتموت فالمساعدين اللي معاك بيصحوك من تاني ، وبشكل عام فى عمل المهمات او تحرير المناطق مع احد المساعدين دول فكان امر ممتع للغاية .

نظام الشراء فى اللعبة فكل حاجة تقدر تشتريها و اللعبة قدمت لك نظام مشتريات ممتاز فانت عندك امكانية انك تشتري اسلحة و الاسلحة متنوعة جدا و تشتري مركبات زي الطيارات و العربيات و القوارب و كل دول هيساعدوك جدا فى المعارك بطرق الهجوم او بعمل المهمات .

و الجزء الخامس خرج عن روتين الاجزاء اللي فاتت فى حاجات كتيرة زي مثلاً جلد الحيوانات اللي كان اساسي فى اللعبة علشان تطور المعدات ففي الجزء الخامس جلد الحيوانات مكنش هو الشئ الاساسي ، الحيوانات و صيدها موجود طبعا فى اللعبة و لكن الجلد نفسه ملوش استخدام فى تطوير معدات البطل و تقدر تبيعهم و تبيع السمك اللي تصطاده بمبالغ عادلة .

قصة لعبة far cry 5
قصة لعبة far cry 5

ذكاء الاعداء عامة فى مرات كان بيعاني من سوء او بطئ الاستجابة بحيث ان فى بعض اللحظات القليلة الذكاء الاصطناعي هتلاقي فيه مشاكل بسيطة ، المهمات معظمها ممتع اللعبة فيها حوالي 150 مهمة اساسية و جانبية و طبعا انشطة مختلفة زي تحرير الـ Outpost صيد الاسماك و Far cry Arced اللي بتسمح لك تعمل خرائط و تنشرها للعب الاون لين .

المهمات الجانبية كتيرة جدا و فيها افكار عظيمة و كانت ممتعة البعض منها كان مقبول لكن الحقيقة ما أصبناش بأي ملل الشئ المتكرر كان فى تحرير المناطق و اللي برضه مكنش شئ اجباري ، فممكن تختم اللعبة كلها من غير تحرير Outpost اختياري .

و اللعبة كانت عادلة جدا فى حكاية المشتريات فمثلا فى بعض الاسلحة او الطيارات ممكن يكون سعرها غالي فاللعبة عملت شئ عادل و اللي هو لو خلصت مهمات معينة فالمهمة دي بتوفرلك طيارة مثلاً او عربيات او شاحنات .

و تطوير مهارات اللاعب كان سلس جدا زي مثلا ان البطل يشيل اربع اسلحة و ترفع من صحة البطل و حاجات كتيرة هتفيدك فى التجربة العظيمة دي ، و المطورين نجحه فى تقديم تجربة بالفعل بتتكلم عن المعتقدات الدينية دي و التصرفات الوحشية و العنيفة حتى مثلاً الاغاني اللي بيغنيها جوزيف سييد اللي مناسبة جداً لعالم اللعبة و الطائفة ، فالاهتمام بالتفاصيل دي خلانا نشعر اننا بالفعل فى سجن و الهروب منه مستحيل .

جرافيك و رسومات لعبة Far Cry 5 :

رسومات اللعبة خارقة و تصميم عالم اللعبة غاية فى الابداع و الجمال ، و تصميم عالم مونتانا و ازاي المطورين قدره انهم يقدمه تصميم اشبه بالفعل بعالم مونتانا اللي بتتميز بروعة المناظر و الجبال و الريف اللي تم تقديمه بطريقة ممتازة و مفيش شك بان المطورين استفادوا جدا بضخامة مدينة Hope فدا خلالهم يبدعوا جدا فى تصميم الثلاث مناطق الريف و الغابات و المزارع و المدن و الشوارع و الجبال و الانهار و البحيرات و كل دا كان ابداع و قدم تفاصيل رائعة .

فعالم اللعبة مبهر و هتستمع بكل لحظة اثناء التجول و التأمل بمناظر اللعبة و كل دا بفضل رسومات اللعبة الخارقة اللي قدمت عالم حيوي جدا الاضاءة و الانعكاسات و المؤثرات ممتازين و day night cycle لاول مرة فى السلسلة .

مراجعة لعبة far cry 5
مراجعة لعبة far cry 5

تصميم الشخصيات و الحركة و تعبيرات الوشوش ممتازة و العروض السينمائية فهي ابداع و الفضل يعود الي الشخصيات الشريرة اللي قدمت دور ممتاز وبصراحة كل الشخصيات عملت اداء ممتاز .

اداء اللعبة على PS4 كان ممتاز اللعبة ادائها رائع و شغالة بشكل سلس معملتش Frame Drop الا مرتين طول فترة اللعب اللي وصلت لـ 35 ساعة ، اما اداء اللعبة على PC فاللعبة معمول لها Optimize محترم و اللاعبين اكدوا انها شغالة سلسة .

الاصوات فى لعبة Far Cry 5  :

بالنسبة للاصوات الاداء الصوتي ممتاز للغاية كل الشخصيات الاساسية عاملة اداء صوتي ممتاز ، فعائلة سييد كان ليها النصيب الاكبر بإعجابي باللعبة بسبب ادائهم الصوتي المتقن و اللي اثر جداً بأدائهم على اللاعبين .

far cry 5 review playstation
far cry 5 review playstation

الساوند تراك حماسي و دا اظن ان دا اول جزء يهتم و يقدم ساوند تراك بالابداع دا ويخلينا ننبهر بجمال الموسيقى اللي كانت شغالة معظم فترات اللعبة و اللي كانت متنوعة و مختلفة فلكل منطقة ليها موسيقى مختلفة و اللي كانت ممتازة بلا شك ، المؤثرات الاصوات المحيطة بالبيئة كانت مهتمة بأدق التفاصيل اما الحوارات اثناء Gameplay فكانت اقل من العادية و كانت بتكرر مع الاسف .

تقييمنا للعبة Far Cry 5 للكمبيوتر :

شركة UbiSoft على الطريق الصحيح فبعد النجاح اللي حققوا فى Watch Dogs 2 و منها بقينا نلاحظ بان الشركة بقت تهتم جدا فى عناوينهم و دلوقتي نجاح اخر للشركة مع Far Cry 5 ، و لو كنت مش محب للسلسلة فا Far Cry 5 هتغير رأيك اللعبة عظيمة و طلعت افضل مما توقعنا ، تقيمنا للعبة هو 9.5 من 10.

 لعبة Far Cry 5 قدرت تتميز و تقدم حاجات مختلفة و تبعد عن الروتين الممل بتاع الاجزاء السابقة و كمان اشتغلوا على افكار الجديدة و بكل بساطة قدموا لنا اضخم لعبة فى السلسلة ، اللعبة ممتعة و لو بتلعبها مع صديق فهتكون المتعة مضاعفة ، اللعبة قدمت محتوى ممتاز لازم تشتريها حالاً ، بنشكركم على المتابعة و متنسوش تقولوا رأيكم لينا فى التعليقات عن لعبة Far Cry 5 دا كان رأينا احنا فى اللعبة مستنين نعرف ارائكم فى اللعبة .

اترك تعليق

يرجي التسجيل لترك تعليقك

شكرا للتعليق