ايه هي الالعاب اللي ممكن تلعبها وانت قاعد فى الكافيه ؟!! (غريبه جداً)

العاب تلعبها وانت فى الكافيه
0

العاب تلعبها وانت فى الكافيه – اهلا بيكم فى موضوع جديد من موقع جوال أبس النهاردة هيبقي موضوع دردشة هنقعد نتكلم فيه عن الالعاب اللي كنا بنلعبها و احنا قاعدين فى الكافيه كل يوم ، طبعاً فى الكافية بنبقى قاعدين على اللاب توب و بالتالي بنلعب العاب خفيفة مش هنقدر نشغل The Witcher مثلاً على اللاب توب المتواضع اللي معانا .

و لكن احنا شايفين ان دي حاجة ايجابية لان بكدة بنقدر ندي وقت للالعاب غالباً مش هنلعبها في البيت و دا بيساعدنا بأننا نوسع مداركنا عن الالعاب و بالتالي نقدر نقدم لكم مواضيع اقوى على المدى الطويل ما علينا مش هو دا موضوعنا النهاردة .

ماذا العب في المقهى ؟!

المهم احنا بنقعد فى كافيه بنشغل سوبر ماريو نلعب لحد البيت السادس مثلاً و بعد كدة بنموت و نقفل اللعبة و نبدأ نكتب المواضيع اللي بعد كدة بتشوفوها ، الاسبوع اللي فات لقينا نفسنا زهقانين و بنجرب حاجات تانية .

حاجات كنا بنلعبها زمااان و بنجرع لها تاني كنوع من انوع النوستاليجا ، مكناش منتظرين من الالعاب دي تكون ممتعة او حتى Playable مقارنة بالالعاب الجديدة و التكنولوجيا اللي احنا وصلنا ليها .

بس اكتشافنا حاجة فاجئتنا بصراحة و هي ان في حاجات ممتعة كتير بل و مازالت تصمد قدام اللي موجود دلوقتي ، حاجات مهما مر الزمن مش هتتأثر لان الحاجات اللي خلتها قوية مش بتتغير ، اهم الكلاسيكيات دي هي الاجزاء بتاعة ماريو القديمة .

الاجزاء بتاعة نترويد القديمة و ميجا مان كاسل فينيا سلاحف النينجا Duck Hunt و Final Fantasy القائمة طويلة جداً ، بس الفكرة ان مش كل الاجزاء كانت بينطبق عليها الفكرة دي ، و دا محتاج دراسة لان بعد الالعاب دي كانت قادة تشد انتباهنا لفترات مختلفة .

في العاب قضينا فيها ساعة و العاب استمرينا فيها 5 دقايق استمتعنا بالاتنين بس كان في عامل مهم جدا بيربط الالعاب اللي خدت مننا وقت اطول ، معظم الالعاب دي كنا اول ما بنبتدي Game Over و بنعيد اللعبة من الاول و بعض الالعاب دي كان بيبقى معاك فيها 3 ضربات بس ، الموضوع دا كان بالنسبة لينا محبط شوية حتى لو ركزت كويس مع اول غلطة بنلاقي نفسنا خسرنا و بنعيد من الاول .

الالعاب اللي قعدنا فيها وقت طويل غالبا مكناش بنسيب الجيم لغاية ما نموت و دا معناه ان السر فى الموضوع ان الالعاب دي كانت سهلة او الي حدا ما Fair اكتر مش بالضرورة سهلة و دا بيدينا فرصة اننا نعرف مفهوم Game Design كان عامل ازاي .

الفرق بين صعوبة ألعاب زمان و ألعاب دلوقتي :

زمان كانت الصعوبة بتاعة الالعاب مبالغ فيها شوية و دا كانت بسبب اجهزة RK اللي هي الاجهزة الكبيرة اللي كانت فى صالات الفيديو جيم زمان و اللي كانت بشتغل بالكوينات.

طبعا المصمم كان بيعمل اللعبة بحيث انه يخليك تصرف اكبر كمية كوينات قبل ما تخلص اللعبة ، الموضوع دا مكنش له لزوم ايام الالعاب بتاعة الكونسول بس الفكرة استمرت لانها كانت بتخلي اللعبة تقعد فترة عند اللي بيلعبها ، و بالتالي المبيعات بتاعتها بتزيد لان الناس بتشوف فيها Value for money عالي انك تشتري لعبة زمان تقعد معاك شهر افضل بكتير من انك تخلصها فى 20 ساعة .

لان زمان اهالينا هما اللي كانوا بيشتروا لينا الالعاب و بالتالي كنا بنشوف الالعاب دي من السنة للسنة حاجة مملة طبعاً .

بعد ما كبرنا و قدرنا نشتري العابنا لنفسنا مبقاش الموضوع منتقي بقينا عاوزين تحدي بس مش محتاجين الصعوبة لان وقتنا بقى ضيق ، علشان كدة العاب زي Dark Souls نجحت جدا فى العصر الحديث لان رغم الصعوبة فهي لعبة Fair جدا التحدي فيها قوي بس المناطق اللي فيها صعوبة محطوطة بفن .

وجهة نظرنا فى ألعاب Timeless Classics :

في وجهة نظرنا الالعاب اللي بنقول عليها Timeless Classics هي اللي قدرت تحقق دا فى وقت التكنولوجيا فيه كانت محدودة جداً ، من الاخر كدة يعني قدرت تعمل اللي دارك سولز دلوقتي تفوقت فيه ، حاجات حلوة كتير جداً محتاجين اننا نقعد و نستكشفها ، و اكيد هنقولكم عليها هنا فى موقع جوال أبس ، هنكمل الموضوع دا في المقالة الجاية .

شكراً للمتابعة و للمزيد عن عالم الالعاب خليكم معانا على جوال أبس .

اترك تعليق

يرجي التسجيل لترك تعليقك

شكرا للتعليق