4 ألعاب على الكمبيوتر خطرة لا تعرفها ويجب ان تكون حذراً عند لعبهم

0

4 ألعاب على الكمبيوتر خطيرة – الالعاب اللي احنا هنتكلم عنها انهاردة هي العاب التقيمات بتاعتها عالية جداً و مشهورة كمان عالمياً و واخدة حقها فى النشر ، لكن يمكن في الوطن العربي مش معرفة لناس كتير و دا شئ مؤسف جدا لانها العاب حلوة اخر حاجة هما عموما 4 ألعاب بس علشان احنا قررنا القائمة دي من موقع جوال أبس متلمش كتير فتعالوا نبدأ .

1- The Forest :

اللعبة دي بدأت تصميمها فى 2014 و مصدرتش غير السنة دي و الحقيقة احنا مجربنهاش غير السنة دي برضه ، اللعبة بتحكي عن طيارة  وقعت فى غابة مهجورة البطل بيسافر مع ابنه و بعد ما الطيارة بتقع البطل بيكتشف ان ابنه مش موجود و بيبدأ يحاول ينجو بنفسه و في نفس الوقت بيدور على ابنه في الغابة اللي مليانة قبائل متوحشة و بدائية و بيحصل فيها احداث غريبة و بيظهر له فيها كائنات ملعونة .

اللعبة لعبة بقاء على الحياة بتحاول تبني فيها مكان لنفسك يحميك من العالم اللي حواليك و فى  نفس الوقت يمكنك من انك تخرج تستكشف الغابة اللي حواليك تلم موارد تقطع شجر بتصطاد حيوانات علشان تاكلها او تحول جلدها الي معدات و دروع و اسلحة .

اللعبة فيها تفاصيل كتير جدا و هتحتاج منك وقت طويل جداً علشان تقدر تفهم ايه المبادئ بتاعة Survival في اللعبة دي و وقت اطول لحد ما تقدر تستقر فى الحصن الصغير بتاعك دا طبعاً هيفضل مستمر لحد ما يبتدي يظهر لك وحش اكبر و اقوى من الافخاخ اللي انت عاملها ، اللعبة دي فيها ساعات من المغامرة الممتعة بننصح الناس كلها انها تلعبها .

2- Subnautica :

اللعبة دي زي اللعبة اللي فاتت لعبة  Survival بس الفرق انها بتحصل تحت المحيط و على كوكب تاني ، الجرافيك فى اللعبة دي في غاية الجمال و اللي بيخلي اللعبة دي بالنسبة لينا لعبة مرعبة شوية لاننا عندنا فوبيا من البحر و بنخاف جدا من مساحات الماية المفتوحة ، كمان الكائنات فى اللعبة دي و السمك حجمهم كبير و دا بالنسبة لينا مرعب بشكل مش طبيعي .

دا غير هندسة الصوت في اللعبة دي و اللي بيضيف مستوى تاني من الخوف بيخلينا حاسيين اننا مخنوقين جدا ، لكن طبعاً دا مش عيب من عيوب اللعبة و لكن العكس تماما دا دليل على واقعية اللعبة و اللي مش محطوط عليها علامة انها لعبة رعب .

فمعنى انها تبقى مخيفة كدة فدا يعتبر Compliment للي صمم الجرافيك و الجو و الصوت بتاع اللعبة ، اللعبة لعبة Open World Survival متصممة حلو جدا معمول لها Balancing محترم و واخدة تقييم عالي جدا ننصحكم تلعبوها من غير تفكير .

3- the messenger :

اللعبة دي لعبة 2D واخدة الاستايل بتاع جرافيك الثمانيات مع Control System المتطور بتاع العصر الحديث ، اللعبة بتتكلم عن محارب نينجا بيحاول ينقذ العالم من شخص شرير و بيقابل في طريقه مجموعة من الكهنة في تنظيم سري مختبئ برة حدود الزمن و اللي بيساعدوا البطل يوصل للشر و يهزموا و في نفس الوقت بيقدموا حوار دمه خفيف و هزلي جدا .

كل حاجة فى اللعبة ممتعة للغاية من اول Leveling System بتصوير المستويات و الاكشن و الالغاز و البوس فايت و لحد القصة و الموسيقى التصويرية ، متخليش اللعبة دي شكلها يخدعك لازم تجربها و صدقنا هتحبها جدا بس العبها بـ Controller نضيف و احنا بنقولك كدة لان اللعبة دي جامدة جداً كنا هنحطها فى المركز الاول لولا اننا جربنا لعبة المركز الاول اللي جاية دي .

4 – Return of the obra Dinn :

اللعبة دي كانت مفاجأة رهيبة فى 2018 كل شئ فى اللعبة دي بيقول اننا هنتخق منها ومكناش مقتنعين بكلام الناس و حبهم ليها و مش فاهم التقييمات العالية بتاعتها ، و لما شوفنا الاعلان اقتنعنا تماماً اننا مش هنحبها ، لعبة Walking Simulator و الجرافيك بتاعها تعبان و لونين بس قولنا ايه الهبل دا ؟! لحد ما شوفنا اسم المصمم Lucas  دماغ لوكس من الادمغة الغريبة جدا بس عبقري بشكل مش طبيعي بيقدر يحول كونسبت مملة جداً لافكار فى منتهى الابداع و التسلية .

اول لعبة ليه كانت لعبة Papers, please. كان مخليك واقف على شباك الجوازات على حدود دولة وهمية و بتكشف على باسبورات الناس ، الفكرة نفسها لو تسمعها مملة جدا بس مع ذلك اللعبة دي حازت على اعجاب الناس و النقاد على حداً سواء ، اللعبة دي نفس الموضوع بالظبط بتاخد فكرة التحقيق و بتنفذها بشكل مليان تفاصيل اكتر و معقد اكتر من غير كمان من اللعبة تساعدك فى اي حاجة .

حاجة بكل المقاييس تخليك تقول انا مش هلعب اللعبة دي ، و مع ذلك بيعمل نفس الانجاز اللي حصل في اللعبة اللي فاتت و بيخلي النظام الصعب المرهق دا نظام ممتع جدا ، و كمان بيميز اللعبة دي و بيحط ميلسوتن جديد غير مقارن فى عالم ألعاب Detective ، قصة بتحكي عن سفينة كل الركاب بتوعها يإما ماتوا يإما اختفوا .

وانت معاك ساعة بترجع الزمن لمدة 3 ثوان قبل الموت مباشرة ، و مطلوب منك تحدد هوية 60 شخص من اللي ماتوا على السفينة و ماتوا ازاي ، اللعبة دي ثورية فى التصميم بتاعها لكن قبل ما تنزلها خد بالك انها محتاجة منك ثقافة و ذكاء عااالي جدا علشان تعرف تحل الالغاز بتاعتها ، اللعبة دي من الاخر عاوزة دماغ جامدة جدا علشان تخلصها لو انت على قدك نصيحة مني متلعبهاش .

بكدة تكون القائمة بتاعة انهاردة انتهت يارب تكون القائمة عجبتكم و يارب الالعاب دي كمان تعجبكم و ياريت تقولوا لينا رأيكم فى التعليقات تحت … شكراً للمتابعة و للمزيد عن عالم الالعاب خليكم معانا على جوال أبس .

اترك تعليق

يرجي التسجيل لترك تعليقك

شكرا للتعليق