مراجعة لعبة Into the breach للكمبيوتر

مراجعة لعبة Into the breach
0

لعبة Into the breach لعبة ممتازة بتجميع بين الخيال العلمي الكئيب و اللي بيتناول اسوء سيناريوهات نهاية العالم و التكنيكات الموجود فى العاب XCom و لكن بشكل افضل و امتع بكتير ، من نفس المصمم اللي صصملنا تحفة التاريخ الحديث لالعاب الفضاء بعنوان FTL ” faster than Light ”

قصة لعبة Into the breach
قصة لعبة Into the breach

المرة دي بيقدم سيناريو مختلف تماماً فيه بتعيش المعركة الاخيرة لنجاة البشر ، و بصراحة تاني لعبة نلعبها السنة دي و نقول انها على قائمة الـ Top 10 بتاعتنا هنا فى جوال أبس وهنتطرق دلوقتي اننا نقدملكم مراجعة لعبة Into the breach .

أسلوب لعب لعبة Into the breach :

مصمم اللعبة هنا هو Subset Studios واحد من اروع الشركات الصاعدة فى عالم تطوير الالعاب ، لعبتهم اللي فاتت كانت FTL واحدة من اجمل الالعاب اللي لعبنها فى العاب الخيال العلمي مش بس كدة و اللعبة الوحيدة فى حروب الفضاء اللي قدرنا نستمتع بيها رغم اننا مش بنحب العاب حروب الفضاء عموماً ، السر في دا ان المصمم قدر يفهم ايه اللي بنحب نستمتع بيه في قصص و مغامرات الفضاء و ايه الجانب الممل و قرر يركز فى اسلوب اللعب او Gameplay على الجانب الممتع بس و اللي يقدر يوصل لعدد ناس اكتر واحنا منهم .

في لعبة Into the breach قدر المصمم برضه انه يتخلص من الاجزاء الغير مهمة فى التجربة و يركز فى التصميم على الجانب الممتع بس ، يعني بدل الخرايط الكبيرة بتاعة Xcom هو مربع واحد محدود جدا الخصوم بتوعك بيدخلوا و يخرجوا منه بشكل مستمر .

وفى المربع دا ركز على ان الميكانكس تكون معقدة جداً و مترابطة جدا و دا في وجهة نظرنا اكبر سر فى حرافية التصميم و دا اللي بيفرق كتير بين لعبة ممتازة زي Into the breach و الالاف الالعاب اللي بتنزل كل سنة و محدش بيعرف عنها حاجة .

في مصممين تقال اوي بيقدروا بأبسط الوسائل انهم يوصلوا تجارب قوية جدا من غير جرافيك و لا واقعية و لا اي حاجة من دي مجرد Mechanic و Art style و مش هنشرحها علشان محتاجة سلسلة كاملة من المراجعات .

قصة لعبة Into the breach :

لعبة Into the breach تحكي عن اخر محاولة لانقاذ البشر ، الابطال اللي انت بتلعب بيهم جايين من المستقبل و راكبين آليات عملاقة متطورة جداً ، هدفهم هو انهم يحاولوا ينقذوا المدن الرئيسية قبل الانهيار الكامل لحضارة البشر و اللي بينتهي عن طريق غزو فضائي هيدمر كل حاجة فى كل العوالم المتوازية ، شئ كئيب جدا انك تفكر فى فكرة زي دي و دا سر قوة اللعبة في وجهة نظرنا انها تعيشك جو التجربة دي من غير ما تحتاج جرافيك خرافي .

مراجعة لعبة Into the breach للكمبيوتر
مراجعة لعبة Into the breach للكمبيوتر

مع ذلك الرسوم فى اللعبة واخدة شكل جذاب جداً شكل العالم و آليات بتاعته و حتى الكائنات الفضائية اللي انت بتحاربها رغم انهم مرسومين بصور 2D الا ان ليها شخصية مميزة جدا فى الشكل و في المضمون حاجة بتخلي دايما ان المعركة ليها احساس شخصي ، لاحظنا كتير اننا بنكلم القطع بتاعتنا و احيانا بالاسم و احنا بنلعب و اسامي احنا اللي مألفينها من الشخصيات دي .

اللعبة من نوع Turn based tactics يعني فيها انت بتاخد دور و الكمبيوتر بياخد دور زي الشطرنج بالظبط ، حبينا جدا ان كل مهم 5 ادوار بس دا خلى خفيفة جدا و في نفس الوقت بيعزز الاحساس بأن العالم بينتهي و انك فعلا فى اخر المعركة و بتحاول فيها تنقذ ما يمكن انقاذه .

المراحل في لعبة Into the breach :

اللعبة عبارة عن 35 مرحلة متقسمة على 5 قارات كل المراحل دي بتتغير كل مرة بشكل عشوائي و بنقول هنا كل مرة لانك هتعيد اللعبة دي كتير جدا و غالباً هتضيع ساعات كتير جدا فى الموضوع دا .

لان مهما اتعلمت دايما هتغلط لان كل مرة بتعيش تجربة مختلفة اصعب كانت او اسهل انت و حظك و الاسلحة اللي بتلاقيها و الـ Pilots اللي انت كمان بتقابلهم ، التنوع الغير طبيعي في شكل المراحل و شكل الوحوش و انواع الاسلحة بتخلق سيناريوهات عددها صعب جداً انك تدركه و دا بيخلي اللعبة دي واحدة من الالعاب اللي هتعيش معاك وقت اطول بكتير من اللي تمنها الضئيل جدا بيعبر عنه رغم انها بتجبرك ترجع تعيد من الاول كل ما تغلط ، لكن دا مبيفرقش معاك لانها على طول بتقدم تجارب ممتعة جدا و مختلفة جدا .

تقييم لعبة Into the breach :

في الوقت اللي في العاب بـ 60 $  بنلعبها يوم واحد مرة واحدة لساعات قليلة و بنرمينها لعبة زي Into the breach بتقدم عدد ساعات لعب طويلة جدا و ممتعة جدا بـ 15 $ بس ، لما المطور ميكونش عنده الامكانيات المادية زي EA و Activision بيضطر انه يلجأ الي الابداع و الافكار الجديدة علشان يقدر ينافس و دا نعتقد انه اقوى حاجة فى فكرة الانتاج المستقل .

اللعبة دي لعبة ممتازة بكل المقاييس ، من الالعاب اللي منقدرش نقول ناقصة حاجة معينة من ناحية اساسيات التصميم كل الاختيارات صح فى التصميم موجودة فى اللعبة دي و علشان كدة هنديها تقدييم 9.6 من 10 .

شكراً للمتابعة و للمزيد عن عالم الالعاب خليكم معانا على جوال أبس .

اترك تعليق

يرجي التسجيل لترك تعليقك

شكرا للتعليق