مراجعة لعبة PUBG على الكمبيوتر و الأكس بوكس

مراجعة لعبة pubg
0

مراجعة لعبة PUBG – تخيل نفسك جوة جزيرة مليانة اسلحة انت و 70 واحد كلهم بيحاولوا يقتلوا الباقيين على الجزيرة و واحد بس هو اللي هيعيش احنا شخصياً ممكن نعمل اي حاجة علشان ننجو من موقف زي دا .

بس زي ما انتم عارفين اننا محترفين جداً فى الاغتيالات و دا مش Fair خالص للناس اللي هتنزل معانا فى الجزيرة لحسن الحظ نقدر نعيش دلوقتي التجربة دي فى امان من ورا اجهزة بتاعتنا عن طريق لعبة PUBG ، تابعنا فى جوال أبس علشان تعرف الكتير عن اللعبة .

اسلوب لعب لعبة PUBG :

زي فيلم Hunger Games بالظبط اللعب بتبدأ جوا طيارة ترميك فى جزيرة فاضية انت ولاعيبة تانية و انت اللي تحدد هتنط امتى من الطيارة ، الاسلحة متوزعة بشكل عشوائي جوة البيوت و اللي يلحق اسلحة كويسة هو غالباً اللي هيكسب ، الجزيرة حجمها كبير جدا لكن فيها دايرة من الكهربا الدايرة دي بتبدأ تتضيق على اللعيبة و اي حد برة الدايرة دي بيبدأ ينقص دمه لحد ما يموت ، اللعبة يعني بالتدريج بتجبر كل اللي بيلعبوا انهم يتجمعوا فى الاخر نقطة واحدة .

مراجعة لعبة pubg
مراجعة لعبة pubg

السؤال بقى هنا ازاي لعبة اونلاين بس بـ 30 $ باعت 17 مليون نسخة و تفوقت على لعبة دوتا 2 و اللي بيلعبها اسبوعياً 10 مليون بني ادم ، الاجابة على السؤال دا تكمن فى التايم لاين بتاع كل ماتش و اللي بنحب نقسمهم جزئين اكشن و داون تايم ، طبعا الاكشن بالطبيعة حماس و جميل و زي الفل بس عمرك ما هتتفوق في دا على حاجة زي Call Of Duty و حتى لو عملت كدة فإنت مش بتعمل حاجة جديدة .

ازاي لعبة زي PUBG قدرت تحقق النجاح دا ، هنا لازم نركز اكتر على Downtime الدوان تايم بالطبيعة حاجة مش حلوة و صعب جدا انك تخليه ممتع فى لعبة اكشن ، لكن المميز في PUBG ان الدوان تايم بتاعها حماسي جدا بالعكس نعتقد ان دا سر قوة اللعبة .

هنفهمك لما تنزل جزيرة فى اول 4 دقايق بتبقى من غير سلاح خالص ، لو حد قفشك من اللعيبة التانين هينولك ال Headshot السليمة و انت مش معاك حتى مقشة تدافع بيها عن نفسك ، و لو انت مقابلتش حد و هتكون بتتحرك و انت على اعصابك لان متوقع ان اي حد يدخل عليك فى اي وقت و انت مشغول فى التدوير على الاسلحة مع الوقت حتى لو نزلت فى حتة مفيش حد فيها حواليك .

مراجعة لعبة pubg للكمبيوتر
مراجعة لعبة pubg للكمبيوتر

فاللعبة بتجبر الناس كلها تدخل فى دايرة واحدة الدايرة دي بتتدضيق العدد بيقل بيفضل فيهم الناس التقال بس و المعركة بتبقى اعنف بكتير و اللي بيكسب فيها هو اللي بيعرف يخدع اللي قدامه ، اللعبة الحقيقة محتاجة خبرة و ذكاء و مهارة عالية جداً .

جرافيك و رسوميات لعبة PUBG :

الجرافيك بتاع اللعبة فى منتهى الجمال اينعم مش فى قوة Battlefield 1 لكن الشاشة بيبقى فيها كمية تفاصيل ضخمة جدا و اللي هيحتاج  منك كارت شاشة متوحش هتحتاج كارت مش اقل من 1060 GTX و اللي هيخليها تشتغل على 60 F بس على جودة متوسطة غير كدة لو عاوز اداء و جودة عالية و بتفكر تشغلها على 4K يبقى عليك بكارت شاشة 1080 و انت طالع الفكرة انك هتحتاج الامكانيات دي علشان تعرف تلعب اساساً .

لعبة pubg للكمبيوتر
لعبة pubg للكمبيوتر

لان لو رد الفعل بتاعك مش سريع اللي قدامك هينفخك لازم تلعبها على 60 F per s و دا مش هتحققه غير بالكروت اللي بنقول عليها ، لو بتستخدم كارت من اللي احنا بنقول عليها تقدر تشغل حاجة اسمها horizon based ambient occlusion plus و دا بيخلي Shadows و الاضاءة شكلهم احلى و كمان هتقدر تشغل حاجة اسمها Highlights و دي بتسجلك الحتت اللي انت قتلت فيها حد علشان ترجع تتفرج عليها او تعملها شير او تتعلم منها حاجة جديدة .

غير كدة اللعبة نفسها كان فيها شوية Bugs خفيفة شوية Lag شوية كراشيز و اللي متوقع من اى لعبة اون لاين بالحجم دا ، مش هنكذب عليك بتبقى مزعجة احيانا لكن مش بتأثر على متعة اللعبة فى الاخر .

تقييم لعبة PUGB :

اللعبة دي من الالعاب اللي لازم و حتماً انك تلعبها كل جيم فيها كمية تينشن عالي جداً في اوقات الاكشن او حتى اوقات الداون تايم اللي بيخليها تجربة فريدة من نوعها ، و خد بالك اللعبة دي صعبة جداً احنا احسن حاجة قدرنا نوصلها كان المركز 17 و هتموت كتير ، بس لحسن الحظ ان الخسارة في اللعبة كفاية انك تخليك تدخل الجيم اللي بعده ، احنا شخصياً ادمناها فى اول اسبوع لعبناها و شكلنا هنديها مركز حلو السنة دي و تقييمنا ليها هو 9.6 من 10 .

شكرا للمتابعة و للمزيد عن عالم الالعاب خليكم معانا على جوال أبس

اترك تعليق

يرجي التسجيل لترك تعليقك

شكرا للتعليق